Cyngor Bro Morgannwg yn cael ei enwi yn Gyflogwr y Flwyddyn ar gyfer Prentisiaethau

Mae Cyngor Bro Morgannwg wedi cael ei enwi yn Gyflogwr y Flwyddyn gan Goleg Caerdydd a'r Fro mewn seremoni wobrwyo yn ystod Wythnos Genedlaethol Prentisiaethau.

• Dydd Mercher, 25 Mis Chwefror 2026

  Bro Morgannwg

Roedd y coleg yn cydnabod y Cyngor fel partner gwerthfawr ers dros ddegawd, gan dynnu sylw at ein hymrwymiad cryf a chyson i ddatblygu talent drwy brentisiaethau. 

Yn ystod y bartneriaeth hon, mae mwy na 60 o brentisiaid wedi symud ymlaen drwy raglenni ar draws sawl sector, gyda chefnogaeth dull hyblyg sy'n cyfuno dysgu academaidd â phrofiad ymarferol.

Mae'r cyflawniad hwn yn cydnabod gwaith adran Datblygu Sefydliadol a Dysgu y Cyngor, sy'n gweithio'n agos gyda gwasanaethau, rheolwyr a phartneriaid allanol i greu llwybrau datblygu ystyrlon. 

Mae eu gwaith yn sicrhau bod prentisiaid yn cael eu cefnogi i feithrin sgiliau, ennill cymwysterau a chyfrannu'n gadarnhaol at ddarparu gwasanaethau a'n cymunedau.

Dywedodd y Cynghorydd Rhiannon Birch, Aelod Cabinet dros Addysg, y Celfyddydau a'r Iaith Gymraeg: “Mae'r gydnabyddiaeth hon fel Cyflogwr y Flwyddyn yn gyflawniad aruthrol i Gyngor Bro Morgannwg ac yn un rydyn ni'n hynod falch o'i dderbyn. Mae ein partneriaeth hirsefydlog gyda Choleg Caerdydd a'r Fro wedi ein galluogi i fuddsoddi'n ystyrlon mewn talent lleol, gan greu cyfleoedd prentisiaethau o ansawdd uchel sy'n agor drysau ac yn newid bywydau.

“Mae prentisiaethau yn rhan hanfodol o'n hymrwymiad i adeiladu gweithlu medrus, gwydn ar gyfer y dyfodol. Maent yn cefnogi cynllunio olyniaeth, yn cryfhau ein gwasanaethau ac yn sicrhau ein bod yn parhau i gyflawni ar gyfer ein cymunedau.”