Asesiad Anghenion Gofalwyr

Os na allwn ddiwallu eich anghenion drwy wybodaeth, cyngor a chymorth yn unig, gofynnwch am asesiad anghenion gofalwyr.

Bydd Asesiad Anghenion Gofalwyr yn edrych ar ba gymorth sydd ei angen arnoch fel gofalwr di-dâl, p'un a ydych yn barod neu'n gallu parhau i ofalu, yr hyn rydych am ei gyflawni mewn bywyd ac a ydych yn gymwys i gael help gan y gwasanaethau cymdeithasol.

Nid yw Asesiad Anghenion Gofalwyr yn gwirio i weld sut neu pam rydych yn gofalu.

Mae darganfod beth yw anghenion person yn dechrau gyda sgwrs. Yn ystod y sgwrs hon, byddwn yn gofyn beth sy'n bwysig i chi.

Byddwn hefyd yn gofyn i chi am y cymorth rydych chi'n ei gael eisoes, a byddwn yn siarad am ble y gallwch gael gafael ar y cymorth sydd ei angen arnoch. Mae'n ystyried cryfderau personol a’r cymorth sydd ar gael gan aelodau o'r teulu, ffrindiau ac eraill yn y gymuned.

Bydd Asesiad yn caniatáu i chi wneud yr isod:  

• Ystyried eich anghenion eich hun

• Meddwl am effaith gofalu ar eich llesiant

• Siarad yn gyfrinachol â rhywun sy’n deall eich sefyllfa

• Cael clust barod i wrando

• Ystyried a allwch chi barhau i ddarparu gofal a pha ddewisiadau sydd gennych

• Trafod y lefel o gefnogaeth rydych chi'n ei ystyried yn bwysig i gyflawni eich swyddogaeth gan gynnal eich iechyd a'ch llesiant eich hun

Gofalwyr Cymru - Asesiadau - Eich canllaw i gael asesiad yng Nghymru 

Rydym yn egluro eich hawliau gofalu a sut y gall eich awdurdod lleol gynnig rhywfaint o gymorth ychwanegol i chi a'r rhai rydych chi'n gofalu amdanynt.

Gofalwyr Cymru - Asesiadau yng Nghymru - Hawdd ei ddeall

Cymhwystra ar gyfer cymorth gan y gwasanaethau cymdeithasol

Mae yna feini prawf cymhwystra cenedlaethol ar gyfer gofal a chymorth i oedolion, plant a gofalwyr.  

Mae 4 maen prawf y mae'n rhaid eu bodloni er mwyn i’r angen fod yn gymwys.  Mae tabl meini prawf ar gyfer oedolion, gofalwyr a phlant.  Mae hawl awtomatig i gymhwystra i’r rheiny sydd mewn perygl o gael eu cam-drin neu eu hesgeuluso.

• Rhoddir cymhwystra i angen nid i berson ac nid yw'n ymwneud â hawl i wasanaeth.

• Caiff ei gymhwyso i warantu mynediad at ofal a chymorth i'r rheiny na allant gyflawni eu deilliannau personol hebddo.  

• Bydd rhai anghenion efallai’n cael eu diwallu drwy gynllun gofal a chymorth, ac eraill drwy fynediad at wasanaethau cymunedol. 

• Gallai gwasanaethau cymunedol gynnwys y rhai a ddarperir gan sefydliadau’r sector cyhoeddus, preifat, a’r 3ydd sector, yn ogystal â grwpiau cymunedol, teulu a ffrindiau. 

• Os na all darparu gofal a chymorth helpu’r unigolyn i gyflawni ei ddeilliannau, ni fydd cymhwystra yn berthnasol.